كتبت : منى حامد
بين الأُمنية والمُنى والأحلام
خدتني الأسامي
لقيت الفرق مِش معاني
الفرق في الأزمان
الأُمنية سهلة تتحقق
إتمنَّى وحقق .. ده كان زمان
دلوقتي صبحنا في زمن الأحلام
و الأحلام بقت أوهام
في زمن البُكاء والحقيقة توجع
ومافيش إنسان ..
صَبح الحلم جريمة
وعدم احساس
إزَّاي تحلم
و إزَّاي تنام مِن الأساس
وغيرك خايف بردان
متشرَّد تعبان
موجوع و جعان
شايف الدنيا
دمار و قرار بالإعدام
إزَّاي تحلم و إزَّاي تنام مِن الأساس
في زمن مافهوش ضمير
غاب عنه الإنسان
في زمن الفلوس فوق النفوس
في زمن الأكابر بياكلوها غموس
و الفقير عليه الكل يدوس
إزَّاي تحلم و إزَّاي تنام مِن الأساس
في زمن الأقنعة و الوشوش
الطيبة ضعف
عايز تعيش يا تخلّيك نملة
يا تعيشها وحش من الوُحوش
كلام في الهايف و حلَّق حوش
علَى الطبلة وعلّي الصوت
علام و مواعظ حقَّك وحقّي
وشْوِش يابني و وطّي الصوت
كلُّه في الفاضي كلُّه فاشوش .
قاتل أو مقتول عيشها بلاش
أو إعمل خدَّك مداس
عيشها و خلاص
أو إفهم بقى بالمَحسوس
بلاش تِحلم على المكشوف
إرحم ضعف غيرك
إبن وطنك و جارك
حياته وجع و أنين جوع وخوف
على ضناه قلبُه بات ملهوف
في بكره لا قادر يفكَّر
ولا قادِر يُشوف
عايز تحلم ..
إحلم بسّ حبَّه مِن الأحمر
و شويّة كُسوف
بلاش أرجوك
تِحلم على المَكشوف .
